Góðir dómar í Frakklandi

Spennusaga Stefáns Mána, Skipið, fær þrjár stjörnur í franska dagblaðinu Telerama.

Gagnrýnandi blaðsins, Martine Laval, fer fögrum orðum um „Noir Océan“ og dregur þar upp líkindi við sjálfan Wagner. Hún segir söguna vera af næsta biblískri stærð og lofar höfundinn fyrir tök hans á öfgafullum andstæðum góðs og ills, ástar og haturs. Blaðið Telerama er þekkt fyrir sparsemi í stjörnugjöfum sínum og þykir vel af sér vikið að fá þar þrjár stjörnur.

Tvær vikur eru síðan bókin kom út í Frakklandi og er hún sú fyrsta frá Stefáni Mána sem kemur þar út. Skipið hefur áður fengið góða dóma bæði í Danmörku og Þýskalandi.