Þyrla sótti veikan sjómann

Þyrla Landhelgisgæslunnar TF-GNA lenti við Landspítalann í Fossvogi rétt fyrir klukkan átta í gærkvöldi með skipverja af þýska togaranum Kiel sem var að veiðum við A-Grænland eða um 480 sml frá Garðskaga þegar skipverjinn fékk slæman brjóstverk síðdegis á laugardag.

Skipstjórinn, sem er íslenskur, hafði samband við sjóbjörgunarstöð á á Grænlandi, sem ekki hafði tök á að senda aðstoð vegna slæms veðurs á svæðinu og var þeim því vísað á Landhelgisgæsluna.

Gæslan bað skipið um að snúa í átt til Íslands og var maðurinn sóttur þegar skipið var statt 150 sjómílur útifyrir Garðskaga. Líðan mannsins var sögð stöðug. Þýski togarinn Kiel er gerður út af dótturfélagi Samherja hf.