Dómari neitar að víkja sæti

Pétur Guðgeirsson, dómari við Héraðsdóm Reykjavíkur, hefur hafnað kröfu fjögurra af níumenningunum, sem ákærðir eru fyrir árás gegn Alþingi, um að víkja sæti.

Krafa fjórmenninganna var byggð á því að með því að hafa lögreglu í dómhúsinu þegar þingað hefur verið í málinu hafi dómarinn verið „nánast fyrirfram að lýsa yfir sekt á hendur" ákærðu og komið með því í veg fyrir að þeir njóti „réttlátrar málsmeðferðar fyrir dómi, eins og þeim er áskilinn í stjórnarskrá".

Dómarinn segir hins vegar í úrskurði sínum að ákvörðun um að hafa lögreglu tiltæka í dómhúsinu sé ekki beint gegn ákærðu í málinu heldur miði hún að því að tryggja frið og reglu í þinghöldunum og þar með að því að gæta réttar og hagsmuna allra málsaðila. Verði ekki séð að dómarinn hafi með þessari ákvörðun sinni fyrirfram lýst yfir sekt á hendur ákærðu eða komið með henni í veg fyrir það að þeir njóti réttlátrar málsmeðferðar fyrir dómi.

Ragnar Aðalsteinsson, lögmaður fjórmenninganna, ætlar að kæra úrskurðinn til Hæstaréttar.