Sólskinsdrengurinn tilnefndur til Voice-verðlaunanna

Sólskinsdrengurinn, heimildarmynd Friðriks Þórs Friðrikssonar um einhverfa drenginn Kela, hefur verið tilnefnd til Voice-verðlaunanna. Þau verða afhent í Paramount studios, Hollywood, þann 13. október, en margar stjörnur koma að þessari verðlaunahátíð. Má nefna að Richard Dreyfuss var kynnir hátíðarinnar í fyrra og Glenn Close kom fram.

Verðlaunin eru veitt leikstjórum og framleiðendum sem með verkum sínum hafa stuðlað að auknum skilningi almennings á geðröskunum, en eins og kunnugt er fjallar Sólskinsdrengurinn um baráttu móður við að ná sambandi við 11 ára einhverfan son sinn en þau fara meðal annars til Bandaríkjanna í leit að lausnum.

Sólskinsdrengurinn eða „A mother's courage: Talking back to autism", eins og hún kallast vestra, hefur hlotið fádæma viðtökur víða um heim, en hún verður tekin til sýninga í kvikmyndahúsum Hollywood og New York í lok mánaðarins. Gagnrýnendur, á borð við Variety og Moving pictures, sögðust hafa upplifað myndina líkt og þeir hefðu orðið vitni að kraftaverki. Myndin var sýnd síðastliðinn apríl á sjónvarpsstöðin HBO, sem hefur 40 milljónir áskrifendur.

Sólskinsdrengurinn féll einnig vel í kramið hjá íslenskum áhorfendum í vetur, en hún verður gefin út á DVD innan skamms, með sex klukkutíma aukaefni.

Friðrik Þór er nýkomin heim frá Toronto þar sem nýjasta kvikmynd hans Mamma Gógó hlaut mikið lof gagnrýnenda.