Telur Gagnaveituna brotlega gegn fjarskiptalögum

Póst- og fjarskiptastofnun (PFS) telur Gagnvaveitu Reykjavíkur hafa brotið gegn fyrri ákvörðun PFS 2006 og 2008 varðandi fjárhagslegan aðskilnað Gagnaveitunnar frá móðurfélagi sínu, Orkuveitu Reykjavíkur (OR).

Þetta kemur fram á heimasíðu stofnunarinnar en athygli vekur að úrskurðurinn er birtur þrátt fyrir að Gagnaveitan hafi saérstaklega óskað eftir því að svo yrði ekki gert.

Þá segir í úrskurðinum að tiltekið ákvæði í lánasamningi Gagnaveitunnar við fjármálastofnun var talið brjóta í bága við framangreindar ákvarðanir PFS. Umrætt ákvæði í lánasamningnum kvað á um að Gagnaveitan myndi ekki greiða vexti af lánum sínum hjá OR á gildistíma lánasamningsins við umrædda fjármálastofnun.

Slíkt fór að mati PFS gegn umræddum ákvörðunum stofnunarinnar og lánasamningi á milli Gagnaveitunnar og OR frá árinu 2007 og braut þar með í bága við fjarskiptalög um aðskilnað sérleyfisstarfsemi frá fjarskiptastarfsemi í rekstri fyrirtækjasamstæðna sem bæði reka fjarskiptastarfsemi og starfsemi sem nýtur einka- eða sérréttinda á öðrum sviðum, til dæmis í tengslum við vinnslu, dreifingar og sölu rafmagns eða heits vatns.