Ölgerðin vill auglýsingu á slökkviliðsstöð

„Það er búið að gera samkomulag um þetta en samningurinn hefur ekki verið samþykktur," segir Páll S. Brynjarsson, sveitastjóri Borgarbyggðar, en auglýsingasamningur á milli Ölgerðar Egils Skallagrímssonar og slökkviliðsins í sveitarfélaginu liggur fyrir í byggðarráði.

Það var slökkviliðsstjórinn sjálfur sem falaðist eftir samningnum að sögn Páls en hann hljóðar upp á 60 til 80 þúsund krónur yfir árið. Í staðinn vill Ölgerðin auglýsa fyrirtækið sitt á slökkviliðsstöðinni sjálfri sem er í Reykholti.

„Á vorin þarf slökkviliðið að takast á við mikið af sinueldum, þá þurfa þeir eitthvað að drekka," segir Páll en hingað til hefur slökkviliðið keypt vatn og gos á kostnað sveitarfélagsins. Verði samningurinn samþykktur mun Ölgerðin skaffa drykkina.

Um er að ræða talsverðan drykkjarkostnað á hverju ári fyrir slökkviliðið og sá slökkviliðstjórinn nokkra hagræðingu með samningnum.

„Við höfum nú ekki fengið mikil viðbrögð en höfum að sjálfsögðu velt því fyrir okkur hvort þetta sé eðlilegt," segir Páll sem tekur fram að um litla auglýsingu sé að ræða í glugga slökkviliðstöðvarinnar.

Byggðarráð mun ekki taka afstöðu til samningsins fyrr en í næstu viku. Aðspurður hvort líklegra sé að hann verði samþykktur svarar Páll því til að hann geti ómögulega tjáð hug nefndarinnar. Hann bendir hinsvegar á að sveitarfélagið sé ávallt að hliðra til í rekstri og leita leiða til þess að spara. Þetta sé bara ein hugmynd af mörgum.