Drukknir unglingar á Menningarnótt

Talsverður viðbúnaður var hjá lögreglu frá klukkan 07:00 að morgni Menningarnætur og maraþons í höfuðborginni. Sá viðbúnaður stóð í sólarhring. Nokkur breyting var gerð á skipulagi umferðarmála að þessu sinni með lokun Þingholtanna og Kvosarinnar, en þær lokanir voru mun umfangsmeiri en áður.

Þetta kemur fram í samantekt lögreglunnar á höfuðborgarsvæðinu síðsta sólarhring, sem send er fjölmiðlum í morgun. Þar segir ennfremur að það sé mat lögreglu að það ófremdarástand sem áður skapaðist í miðborginni vegna lagningar bifreiða hafi að stórum hluta verið leyst með þessari breytingu.

„Verkefni tengd umferðareftirliti voru þó fyrirferðarmest hjá lögreglu yfir daginn. Engin alvarleg umferðaróhöpp áttu sér stað þrátt fyrir mikla umferð.

Um kvöldið og nóttina bar nokkuð á unglingadrykkju, en á þriðja tug ungmenna voru vistuð í athvarfi á vegum ÍTR vegna ölvunar. Þau voru sótt af forráðamönnum.

Þá tók lögregla áfengi af á annan tug einstaklinga sem ekki höfðu aldur til áfengisdrykku.

Það er mat lögreglu að það skipulag sem nú er unnið eftir hafi tekist vonum framar. Unglingadrykkja, þó hún hafi ekki verið meira áberandi nú en síðustu ár, er þó áhyggjuefni. Þar þurfa allir að leggjast á eitt svo árangri megi ná, ekki síst foreldrar.

Nokkuð á annan tug líkamsárása voru tilkynnt til lögreglu engin þó alvarleg. Fangageymslur lögreglunnar fylltust þegar líða tók á morguninn.

Fyrr um kvöldið var sérstakt eftirlit með umferð skemmtibáta á sundunum einn skipstjóri var handtekinn grunaður um að stjórna bát sínum undir áhrifum áfengis," segir í tilkynningunni.