Fyrsta skóflustungan að nýrri reiðhöll

Guðríður Arnardóttir, formaður bæjarráðs Kópavogs, tók í dag fyrstu skóflustunguna að nýrri reiðhöll á Kjóavöllum, að lokinni hópreið hestamanna inn á svæðið. Þar með hefjast undirbúningsframkvæmdir.

Bygging reiðhallarinnar er iður í því að færa aðstöðu hestamannafélagsins Gusts frá Glaðheimum upp á Kjóavelli samkvæmt samningi sem gerður var árið 2006. Stefnt er að því að bjóða bygginguna út í alútboði fyrir árslok og að fyrsta áfanga ljúki haustið 2011. Þetta kemur fram í fréttatilkynningu Kópavogsbæ.

Bæjaryfirvöld og stjórn Gusts munu á næstunni fara yfir samninginn frá árinu 2006 og endurskoða hann í ljósi breyttra aðstæðna í samfélaginu og því liggja endanlegar áætlanir um stærð reiðhallarinnar, verklok og fleira ekki fyrir.

Guðríður sagði við athöfnina í dag að þótt harkalega hefði verið tekist á um Glaðheimalandið og uppkaupin þar árið 2006 hafi alla tíð ríkt einhugur í bæjarstjórn um uppbyggingu Gusts á Kjóavöllum. „Gustur er eitt öflugasta hestamannafélag landsins og munu bæjaryfirvöld í Kópavogi kappkosta að koma félaginu í örugga höfn á nýjum stað."