Laumufarþeginn í umsjá barnaverndar

Drengurinn sem kom sem laumufarþegi með Norrænu í gær var í nótt í umsjá stuðningfjölskyldu á vegum barnavendar Reykjanesbæjar.

Starfsmenn barnaverndar leita nú að fósturfjölskyldu sem getur tekið hann að sér í lengri tíma eða á meðan farið er yfir mál hans hjá Útlendingastofnun.

Drengurinn er um það bil fjórtán ára. Ekki er vitað með vissu hvaðan hann kemur en hann kennir sig við frelsishreyfinguna Polisario í Vestur-Sahara en sú hreyfing berst fyrir sjálfstæði Vestur-Sahara frá Marokkó.

Hann hefur óskað eftir hæli hér á landi. Lögregla og Útlendingastofnun vinna að máli hans. Starfsmaður Útlendingastofnunnar á hælissviði segir að kanna þurfi hvort hann eigi fjölskyldu, hvort hann sé öruggur í heimalandi sínu og fái þar umönnum. Lítið er vitað um hagi hans enn sem komið er en hann mun fara í skýrslutöku hjá lögreglu í dag.

Drengurinn var klæðalítill við komuna eða aðeins í gallabuxum og á bol. Talið er að hann hafi falið sig á bílfari innan um bíla og komist um borð í Danmörku eða í Færeyjum. Ekki er enn vitað hvaðan hann kom áður en hann laumaðist um borð og hve lengi hann hefur verið vegalaus.

Barnavernd Reykjanesbæjar er ætlað að sjá til þess að hann fái trygga umönnun á meðan hann er hér á landi.