Segja öryggisbúnað í Herjólfi ónothæfan

Fullyrt er að sjósetningarbúnaður björgunarbáta um borð í farþegaferjunni Herjólfi sé gamaldags og vart nothæfur í neyð. Búnaðurinn, sem er handvirkur, stenst Evróputilskipun um öryggisbúnað um borð í skipum í millilandasiglingum.

„Það getur vel verið að búnaðurinn standist tilskipun frá Evrópu. En það breytir því samt ekki að til þess að koma nokkur hundruð manns frá skipinu í björgunarbátum verður að nota handsnúinn krana," segir Sigmund Jóhannsson, teiknari og uppfinningamaður. Sigmund hannaði sjósetningarbúnað fyrir björgunarbáta sem við hann er kenndur. „Ef þú hugsar þér úfinn sjó og þrjátíu gráðu halla á skipinu þá sér það hver heilvita maður að þessi búnaður er ónothæfur." Sigmund segir að betri og öruggari sjósetningarbúnaður sé bæði fáanlegur hérlendis og utan landsteinanna.

Sigmund og Friðrik Ásmundsson, fyrrverandi skólastjóri Stýrimannaskólans í Vestmannaeyjum, skrifa grein á fréttavefinn eyjafrettir.is þar sem þeir fullyrða að trúlega sé ekkert íslenskt skip með eins fornfálegan sjósetningarbúnað björgunarbáta og Herjólfur. Þeir fara fram á að almannavarnanefnd Vestmannaeyja, eða aðrir sem málið varðar, láti fara fram óháða rannsókn á búnaðinum.

Fréttablaðið hefur haft samband við sjómenn sem unnið hafa um borð í Herjólfi og aðra sem þekkja vel til skipsins og búnaðarins. Þeir taka undir að hann sé afar erfiður í notkun og langan tíma taki að koma fólki frá skipinu. Björgunar­æfingar, sem gerðar hafi verið við bestu aðstæður, staðfesti það.

Hins vegar liggi ekki fyrir hvort annar nýrri búnaður myndi henta betur. Þar á meðal rennur, svipaðar þeim sem nýttar eru til að koma fólki út úr farþegaþotum, sem teknar hafa verið um borð í mörgum ferjum erlendis á undanförnum árum.

Geir Þór Geirsson, forstöðumaður skipaeftirlitssviðs Siglingamálastofnunar, segir búnaðinn um borð uppfylla þær kröfur sem gerðar eru samkvæmt reglugerð um farþegaskip í innanlandssiglingum og að Siglingastofnun geti ekki krafist búnaðar um borð í skip umfram það sem reglur gera ráð fyrir.

„Það er hægt að fá mismunandi tegundir af búnaði til að sjósetja björgunarbáta og til að rýma skip. Sjálfsagt er slíkur búnaður misjafnlega góður eða hentar misjafnlega eftir atvikum. Það má spyrja hvort þetta sé besti búnaðurinn sem hægt er að fá. Það er huglægt mat. En búnaðurinn uppfyllir kröfurnar," segir Geir.

svavar@frettabladid.is