Pilturinn kominn með fósturfjölskyldu

Búið er að finna drengnum, sem var laumufarþegi í Norrænu, fósturfjölskyldu. Forstöðumaður hælissviðs Útlendingastofnunar segir hann með yngstu börnum sem hingað hafa komið einsömul og leitað hælis. Nokkur hundruð vegalaus börn leita til Noregs ár hvert

Á undanförnum árum hefur þess orðið vart í vaxandi mæli í nágrannaríkjum okkar að erlend börn, sem eru ein síns liðs, óska hælis eða finnast þar óskráð.

Í gær kom hingað til lands fjórtán eða fimmtán ára drengur sem líklega hefur laumast í Norrænu í Danmörku.

Hann var í nótt í umsjá stuðningsfjölskyldu á vegum barnaverndar Reykjanesbæjar en nú er búið að finna honum fósturfjölskyldu sem getur annast hann á meðan farið er yfir mál hans hjá Útlendingastofnun.

Þorsteinn Gunnarsson, forstöðumaður hælissviðs Útlendingastofnunar, segir mál hans fá flýtimeðferð og þegar hafi honum verið skipaður talsmaður. Hann segir piltinn vera með þeim yngstu sem hann hafi séð.

Drengurinn var klæðalítill við komuna eða aðeins í gallabuxum og á bol. Hann kennir sig við frelsishreyfinguna Polisario í Vestur-Sahara en sú hreyfing berst fyrir sjálfstæði Vestur-Sahara frá Marokkó. Ekki er vitað hvernig hann ferðaðist þaðan og hvort hann eigi fjölskyldu en það mun Útlendingastofnun kanna. Auk þess sem rannsakað verður hvort hann hafi komist í kast við menn sem stunda mansal.

Ekki mun koma til greina að senda hann í flóttamannabúðir í Grikklandi.