Þyrla sótti tvo alvarlega slasaða eftir bílslys

Slys Tveir voru fluttir mikið slasaðir með þyrlu á Landspítalann í Reykjavík skömmu fyrir hádegi í gær eftir að smárúta með sex manns valt á Biskupstungnabraut, á milli Minni-Borgar og Svínavatns. Sá þriðji var fluttur rakleiðis með sjúkrabíl til Reykjavíkur og sá fjórði var fluttur til borgarinnar eftir skoðun á Heilsugæslustöðinni á Selfossi.

Í smárútunni voru kínverskir og bandarískir ferðamenn og svo virðist sem ökumaðurinn, kínversk kona, hafi misst stjórn á bílnum í beygju. Aðstæður til aksturs voru hinar bestu, vegurinn er malbikaður og var þurr þegar slysið varð.

Annar þeirra sem mest slasaðist skarst á slagæð og hinn hlaut höfuðáverka. Þeir voru ekki taldir í lífshættu í gær. Upphaflega var talið að þrír þyrftu að komast undir læknis­hendur í Reykjavík og voru hinir sendir á Heilsugæslustöðina á Selfossi. Þegar þangað var komið uppgötvuðust innvortis áverkar í kviðarholi eins þeirra og var hann þá í snarhasti sendur til Reykjavíkur.

Veginum var lokað fyrir umferð um skeið vegna slyssins og umferðinni beint um Sólheimaveg.