Jóhanna lagði áherslu á réttindi kvenna og barna

Jóhanna Sigurðardóttir forsætisráðherra lagði áherslu á réttindi kvenna og barna í ræðu sinni á leiðtogafundi Sameinuðu þjóðanna um þúsaldarmarkmiðin svokölluðu í dag. Í ræðunni sagði Jóhanna meðal annars að jafnrétti kynjanna væri einn lykillinn að markmiðunum. Tryggja yrði börnum viðunandi menntun, aðbúnað og skilyrði til vaxtar.

Hún benti á að mörgum þróunarríkjum hefði tekist vel til á síðustu árum í þessum efnum en engu að síður væri það staðreynd að konur stæðu verr í heiminum þegar kemur að fátækt og að víða væri þeim mismunað í námi, heislugæslu og atvinnu. Jóhanna minnti á nauðsyn þess að bera virðingu fyrir mannréttindum og sagði hún þjóðir heimsins þurfa að bregðast betur við þegar ríki virði ekki mannréttindi eigin þegna.

„Með forystu og pólitískum vilja getum við náð raunverulegum árangri og gert heim án fátæktar að veruleika," sagði Jóhanna einnig.

Forsætisráðherra verður viðstödd opnun allsherjarþingsins á morgun, fimmtudag og situr hádegisverð í boði aðalframkvæmdastjóra Ban Ki-Moon. Síðdegis á morgun tekur hún þátt í ráðstefnu sem haldin er á vegum Ráðs kvenna í leiðtogastöðum (Council of Women World Leaders) o.fl. þar sem forsetar Litháen og Finnlands stýra umræðum.