Samtrygging velti fjármálakerfinu

Menningarbundnar hugmyndir og orðræða um kyn, karlmennsku og kvenleika léku stórt hlutverk í atburðarásinni sem leiddi til hruns íslenska bankakerfisins að mati dr. Þorgerðar Einarsdóttur og dr. Gyðu Margrétar Pétursdóttur sem unnu kynjafræðilega greiningu á skýrslu rannsóknarnefndar Alþingis að beiðni þingmannanefndarinnar.

Þorgerður og Gyða Margrét kynntu rannsókn sína á fjölsóttum fyrirlestri í Háskóla Íslands í gær.

Meðal þess sem þær fjölluðu um var hvernig kunningja- og ættartengsl eða tengslanet karla voru ráðandi þáttur í framgangi atburðarásarinnar og það hvernig óformlegum boðleiðum var beitt. Í fyrirspurnum eftir framsöguna tóku þær undir það sjónarmið að smæð íslensks samfélags kunni að auka áhrif tengslanetsins miðað við það sem mætti ætla í stærra samfélagi.

Sömuleiðis lýstu þær hugmyndum um meinta yfirburði íslenskra karla í alþjóðlegum fjármálaheimi og sýndu dæmi um orðræðuna um djarfa og snjalla íslenska kaupsýslumenn sem fram kom meðal annars í ræðum ráðamanna á tyllidögum.- ss