Flogið til Húsavíkur vegna verkfalls slökkviliðsmanna

Vegna boðaðs verkfalls slökkviliðsmanna á morgun hefur Flugfélag Íslands gert ráðstafanir til að fljúga áætlunarflug sitt til Húsavíkur í stað Akureyrar ef til verkfalls kemur. Forstjóri flugfélagsins vonast til þess að deiluaðilar nái saman þar sem kostnaður félagsins og óþægindi farþega séu mikil.

Samninganefndir Landssambands slökkviliðs- og sjúkraflutningamanna og Launanefndar sveitarfélaga komu saman til fundar í hádeginu í því skyni að reyna að ná lendingu í langvinnri kjaradeilu sinni. Takist ekki nýir samningar í dag hefst enn ein lota verkfalls slökkviliðs- og sjúkraflutningamanna á morgun sem hefur meðal annars áhrif á innanlandsflug.

Flugfélag Íslands hefur gert ráðstafanir til að flýta fyrstu tveimur brottförum á morgun þannig að þær lendi áður en til boðaðs verkfalls kemur en aðrar brottfarir þann dag munu verða til Húsavíkur.

„Flugfélag Íslands vonast til að aðilar nái saman þannig að hægt verði að aflýsa verkfalli en kostnaður félagsins og óþægindi farþega eru mikil vegna deilu sem Flugfélag Íslands á ekki aðild að," segir Árni Gunnarsson, framkvæmdastjóri, í tilkynningu.