Slökkviliðsmenn æfir yfir afskiptum bæjarstjóra

Slökkviliðs- og sjúkraflutningamenn eru æfir yfir afskiptum starfandi bæjarstjóra á Akureyri, af deilu þeirra við launanefnd sveitarfélaganna. Karl Guðmundsson, sem hefur verið starfandi bæjarstjóri, beitti sér fyrir því að slökkvibíll fari til Húsavíkur á morgun, þegar þriðja verkfall slökkviliðs og sjúkraflutnignamanna skellur á. Þetta telja slökkviliðsmenn að sé skýrt verkfallsbrot.

Samninganefndir Landssambands slökkviliðs- og sjúkraflutningamanna og Launanefndar sveitarfélaga koma saman til fundar nú í hádeginu í því skyni að reyna að ná lendingu í langvinnri kjaradeilu sinni. Takist ekki nýir samningar í dag hefst enn ein lota verkfalls slökkviliðs- og sjúkraflutningamanna á morgun. Verkfallið verður þá 16 klukkustunda langt eins og á síðasta föstudag. Núna bætist hins vegar við ótímabundið yfirvinnubann. Það getur þýtt að ekki verði hægt að fullmanna allar vaktir.

Í verkfalli slökkviliðs- og sjúkraflutningamanna fyrir viku, var ákveðið að flytja slökkvibíl frá Akureyri til Húsavíkur. Til stendur að gera þetta aftur á morgun.

Fréttastofan hefur í höndum tölvupóst þar sem vísað er til samskipta Karls Guðmundssonar, sem var starfandi bæjarstjóri á Akureyri þangað til í dag, við umdæmisstjóra Akureyrarflugvallar. Þar er vísað til fyrri samskipta og munnlegs samkomulags um að slökkvibíll fari til Húsavíkur á morgun. Það telja slökkviliðsmenn vera ótvírætt verkfallsbrot og telja að fordæmi séu í dómum félagsdóms um slíkt. Þeir eru enn fremur æfir yfir afskiptum bæjarstjórans starfandi, því þeir hafa hingað til talið að launanefnd sveitarfélaganna hefði óskorað umboð í deilunni.