Vilja eigendafund vegna stöðu Orkuveitunnar

Bæjarráð Akraness og byggðarráð Borgarbyggðar samþykktu á fundum sínum síðastliðinn fimmtudag að óska eftir eigendafundi í Orkuveitu Reykjavíkur. Fundurinn yrði haldinn í kjölfar yfirlýsinga stjórnarformanns Orkuveitu Reykjuvíkur um breytta stefnu í rekstri fyrirtækisins vegna atbeina borgarstjóra, brottvikningu forstjóra og ýmissa annarra stjórnarhátta án samráðs við eigendur Orkuveitunnar.

Á vef Skessuhorns segir að þetta sé ekki í fyrsta sinn sem þessir sameigendur Orkuveitunnar séu ósáttir við aðgerðir stjórnar og stjórnenda fyrirtækisins sem gerðar séu án samráðs við smærri eigendur. Stjórn OR hafi fyrir nokkru gefið loforð um að slíkt myndi ekki endurtaka sig en önnur reyndist raunin.

„Það er ekki síst mikilvægt á þessum viðsjárverðu tímum að haft sé samráð við alla aðila og sátt ríki um hlutina," er haft eftir Guðmundi Páli Jónssyni á vef Skessuhorns. Hann á sæti í eigendanefnd OR ásamt Birni Bjarka Þorsteinssyni frá Borgarbyggð og fulltrúum Reykjavíkurborgar, m.a. Hönnu Birnu Kristjánsdóttur, Degi Eggertssyni og Jóni Gnarr borgarstjóra.