Hreyfingin ítrekar tillögu um að almenningur fái gögnin

Þingmenn Hreyfingarinnar ítreka tillögu sína um að trúnaðargögn þingmannanefndar Atla Gíslasonar verði sett á netið svo almenningur fái tækifæri til að kynna sér þau. Birgitta Jónsdóttir þingmaður Hreyfingarinnar lagði þetta til á fundi nefndarinnar síðastliðinn föstudag en því var hafnað á þeirri forsendu að virða verði trúnað við fræðimenn og sérfræðinga.

„Við, þingmenn Hreyfingarinnar, viljum hér með ítreka tillöguna og förum þess á leit við nefndina að hún beiti sér fyrir því að umrædd gögn verði gerð opinber með leyfi þeirra fræðimanna og sérfræðinga sem um ræðir," segja þingmennirnir.

„Það er mikilvægt vegna þeirrar umræðu sem hefur skapast inni í þingsölum og varpað tortryggni á störf nefndarinnar að sem flestir hafi aðgegni að þessum gögnum til að sýna fram á að ekkert er að finna í þessum gögnum sem gefur tilefni til tortryggni á heilindi þeirrar vinnu sem þar fór fram."