Þyrla og varðskip leita að báti á Reykjanesinu

Þyrla Landhelgisgæslunnar auk varðskips leita að línu- og handfærabát, sem síðast heyrðist til um hádegi í dag. Var báturinn þá staddur á Boðagrunni eða 40 sjómílur SV af Reykjanesi.

Ítrekaðar tilraunir varðstjóra Landhelgisgæslunnar við að ná sambandi við bátinn hafa ekki borið árangur.

Samkvæmt verklagsreglum er varðstjórum þá skylt að kalla eftir aðstoð allra sjóbjörgunareininga á svæðinu.

Grunur leikur á að báturinn hafa siglt út fyrir langdrægi fjareftirlitskerfisins eða um bilun í búnaði sé að ræða en ágætt veður er á svæðinu.

Slysavarnarfélag Landsbjargar á Suðurnesjum og nærstaddir bátar hafa einnig verið beðnir um að hefja leit að línu- og handfærabátnum.