Blásandi borhola gæti ráðið úrslitum

Virkjana- og rannsóknaleyfi á Reykjanesskaga, sem HS Orka sótti um fyrir þremur árum, hafa ekki enn fengist, meðal annars vegna ágreinings vísindamanna um hve mikil orka leynist í iðrum jarðar. Þetta er ein af ástæðum þess að HS Orka telur forsendur orkusamning vegna álvers í Helguvík brostnar.

Álversframkvæmdirnar í Helguvík eru í uppnámi. Orkufyrirtækin, sem Norðurál samdi við um orkukaup fyrir þremur árum, hafa ekki getað virkjað. Forstjóri HS Orku, Júlíus Jónsson, segir félagið hafa gert sér vonir um að geta byrjað að afhenda orkuna fyrir árslok 2009, en það hafi ekki enn fengið leyfi til að byrja á neinu.

Fyrst átti að stækka Reykjanesvirkjun um 50 megavött með því að bæta við þriðju aflvélinni, sem þegar er komin til landsins. Orkustofnun efast hins vegar um að jarðhitasvæðið standi undir viðbótinni.

Júlíus segir HS Orku ekki sammála því og að vélin hefði annars ekki verið keypt. Sérfræðingar HS Orku, sem og ráðgjafar hjá ÍSOR, Vatnaskilum og Mannviti, teldu, - þó svo menn gætu aldrei verið 100 prósent vissir, - yfirgnæfandi líkur og réttlætanlegt að ráðast í framkvæmdir. Orkustofnun teldi hins vegar leika vafa um þetta.

Borhola frá því í vor gæti ráðið úrslitum en hún verður látin blása í næsta mánuði, til að sannreyna hve mikil orða leynist oní henni.

En HS Orka vill virkja á fleiri stöðum fyrir Helguvík; í Eldvörpum og Krýsuvík, og óskaði fyrir þremur árum eftir samþykki viðkomandi sveitarfélaga, Grindavíkur og Hafnarfjarðar, fyrir rannsóknarborunum. Þetta væri enn í vinnslu og á meðan gæti HS Orka hvorki rannsakað né borað, segir Júlíus.

Meðal annars setur Grindavík þá kröfu að orkan verði nýtt í heimabyggð, en það segir Júlíus að hjálpi ekki. Grindvíkingar hafi lýst því yfir að þeir vilji að minnsta kosti fá hluta af orkunni til nýtingar í Grindavík.