Flugeldarnir verða í boði Vodafone

Flugeldasýningin sem ávallt hefur verið fastur liður á Menningarnótt í Reykjavík verður að þessu sinni í boði Vodafone. Í tilkynningu frá Höfuðborgarstofu segir að Vodafone muni kosta sýninguna, samkvæmt samkomulagi sem náðst hafi á milli Höfuðborgarstofu og fyrirtækisins.

„Flugeldasýningin hefur frá upphafi verið hápunktur Menningarnætur, þar sem borgarbúar á öllum aldri og gestir þeirra hafa sameinast undir rökkvuðum ágústhimni, lýstum upp af þúsundum ljósa í öllum regnbogans litum," segir ennfremur. Hingað til hefur Orkuveitan kostað sýninguna sem kostar á bilinu tvær til þrjár milljónir.

Þá segir að með með þátttöku sinni í þessum vinsæla dagskrárlið Menningarnætur vili Vodafone þakka viðskiptavinum sínum fyrir viðskiptin og leyfa öðrum að njóta um leið. „Vodafone er þakklátt fyrir að fá tækifæri til að taka þátt í dagskránni og styðja í leiðinni Hjálparsveit skáta í Reykjavík, sem hefur umsjón með sýningunni."