Flugeldasýningin verður haldin

Hætt hefur verið við að blása flugeldasýninguna á Menningarnótt af, samkvæmt upplýsingum sem fengust hjá Höfuðborgarstofu. Líkt og undanfarin ár verður sýningin í samtarfi við Hjálparsveit skáta í Reykjavík. Tilkynning þess efnis verður send út síðar í dag.

Í byrjun vikunnar viðraði Jón Gnarr, borgarstjóri, þá hugmynd að hætt yrði við flugeldasýninguna í ljósi þess að með því myndu þrjár milljónir sparast. Orkuveita Reykjavíkur hefur fjármagnað flugeldasýningarnar síðastliðinn ár.

Ekki fengust upplýsingar hjá Höfuðborgarstofu hvort að Orkuveitan greiði fyrir sýninguna í ár en rætt hefur verið um aðkomu einkaðila í þessu samhengi.