Segir andstöðu AGS þurrka millistéttina út

Andstaða Alþjóðagjaldeyrissjóðsins við almenna niðurfærslu skulda mun þurrka út millistéttina á Íslandi að mati Birgittu Jónsdóttur, þingmanns Hreyfingarinnar. Sjóðurinn vill einungis færa niður skuldir þeirra sem þegar eru komnir í þrot.

Sendinefnd frá Alþjóðagjaldeyrissjóðnum er stödd hér á landi til að undirbúa fjórðu endurskoðun á efnhagsáætlun íslands. Þingmenn Hreyfingarinnar funduðu með sendinefndinni á föstudag og spurðu meðal annars út í afstöðu sjóðsins til hugmynda um almenna niðurfærslu skulda.

Birgitta Jónsdóttir, þingmaður Hreyfingarinnar, segir að fram hafi komið á fundinum að sjóðurinn sé aðeins hlynntur skuldaniðurfærslu hjá þeim sem þegar eru komnir í þrot.

„Þeir vilja aðeins hjálpa þeim sem eru komnir í þrot en ekki þeim sem geta borgað," segir Birgitta. Um þrjá hópi væri að ræða en ekki tvo. „Sá þriðji er hópurinn sem getur stundum borgað en þarf að velja á milli þess að borga af lánunum sínum eða kaupa mat."

„Ég spurði hvort þeir myndu vilja vera ábyrgir fyrir því að sá hrynji líka fram af bjargarbrúninni," segir Birgitta en fátt hafi verið um svör. Hún segir AGS í stuttu máli vera á móti almennri niðurfærslu skulda.