„Mótmælendur skirrðust ekki við að beita líkamlegu valdi“

Forseti Alþingis, Ásta R. Jóhannesdóttir, svaraði fyrirspurn Birgittu Jónsdóttur, þingmanns Hreyfingarinnar, á Alþingi í dag um aðkomu Alþingis að málarekstri gegn nímenningum sem hafa verið ákærðir fyrir að ryðjast inn á Alþingi.

Spurningar Birgittu voru eftirfarandi:

1. Með hvaða hætti var tekin ákvörðun um aðkomu Alþingis að ákærum gegn níu einstaklingum vegna atburða sem áttu sér stað í Alþingishúsinu og við það 8. desember 2008?

2. Hver óskaði eftir rannsókn málsins og í umboði hvers var það?

3. Er það rétt sem fram kom í máli verjanda tveggja hinna ákærðu fyrir héraðsdómi að skrifstofa Alþingis hafi haft aðkomu að málinu og ef svo er, hver var sú aðkoma og hver var formlegur grundvöllur hennar?

Í svari Ástu rekur hún málsatvik eins og þau koma að starfsmönnum þingsins. Hún segir að það hafi verið skrifstofustjóri Alþingis sem óskaði eftir lögreglurannsókn, og þar hafi forseti Alþingis hvergi komi að.

Í svarinu kemur fram að myndandsupptaka sýni að þingvörður, sem átti að gæta inngangsins, hafi verið yfirbugaður til að tryggja að mannsöfnuðurinn kæmist óhindraður inn í húsið. Því mátti ætla að hann væri ekki kominn í friðsamlegum tilgangi samkvæmt svari Ástu.

Svo segir í svarinu að af samtölunum við þingverði og lögreglumanninn varð enn fremur ráðið að hópurinn skirrðist ekki við að beita líkamlegu valdi til að komast í tæri við þingmenn sem sátu í þingsalnum á fundi. Því hafi það verið mat aðallögfræðings Alþingis að rík ástæða væri til að málið yrði rannsakað af lögreglu.

Þá sagði í svarinu að skrifstofustjóra Alþingis hvíli sjálfstæð skylda til að standa vörð um öryggi starfsmanna Alþingis sem og alþingismanna.

Fyrirtaka fer fram í málinu á morgun. Þegar það var þingfest þurfti að færa áhorfendur út úr salnum með lögregluvaldi þar sem ekkert pláss var í salnum að mati dómara Héraðsdóms Reykjavíkur.

Svarið má lesa í heild sinni hér.