Sóknaráætlun á áætlun

Vinna við sóknaráætlun ríkisstjórnarinnar, 20/20 Sóknaráætlun, gengur samkvæmt áætlun, að fram kemur í tilkynningu frá forsætisráðuneytinu. Boðað hefur verið til ráðstefnu síðar í vikunni sem er opin öllum þar sem fjallað verður sóknarfæri og áherslur á komandi árum.

Markmið sóknaráætlunar er að mótuð verði heildstæð stefna fyrir Ísland í þágu atvinnulífs og samfélags. Ísland skipi sér aftur í fremstu röð í verðmætasköpun, menntun, velferð og lífsgæðum.

Í tilkynningu ráðuneytisins segir að í upphafi árs sé lögð áhersla á að fá yfirsýn yfir þá stefnumótun sem gerð hefur verið á ýmsum sviðum samfélagsins frá hruni. „Í því skyni hefur forsætisráðherra og stýrihópur 20/20 Sóknaráætlunar boðað til ráðstefnunnar Sóknaráætlun fyrir Ísland: Horft til framtíðar fyrir atvinnulíf og samfélag þann 28. janúar næstkomandi þar sem samtök, grasrótarhópar og hagsmunaaðilar fjalla um sóknarfæri og áherslur sem geta aukið lífsgæði og samkeppnishæfni Íslands á komandi árum.“

Ráðstefnan verður haldin á Radisson SAS Hótel Sögu næstkomandi fimmtudag frá klukkan 13 til 17:00.

Vefsvæði 20/20 Sóknaráætlunar er á vefslóðinni www.island.is en þar er hægt fylgst með framvindu sóknaráætlunarinnar.