Grunaðir árásarmenn eiga langan sakaferil að baki

Mennirnir þrír sem sitja í gæsluvarðhaldi vegna gruns um aðild að alvarlegri árás í íbúð á Selfossi á laugardag eiga allir langan sakaferil að baki.

Þeir eru ungir að aldri, fæddir 1986, 1988 og 1991.

Þetta kemur fram í Sunnlenska fréttablaðinu.

Þar segir að sá yngsti hafi verið dæmdur í fjögurra ára fangelsi aðeins sextán ára gamall, meðal annars fyrir að hafa ráðist á leigubílstjóra með klaufhamri. Hann hlaut reynslulausn í haust.

Samkvæmt heimildum Sunnlenska fréttablaðsins telur lögregla að þrímenningarnir hafi skipulagt árásina með nokkrum fyrirvara, en játning liggur ekki fyrir.