Kvennaskólinn í Miðbæjarskólann

Húsnæði Miðbæjarskólans verður nýtt undir starfsemi Kvennaskólans í Reykjavík, samkvæmt samningi um samstarf ríkis og borgar í húsnæðismálum reykvískra framhaldsskóla til ársins 2014. Borgarráð samþykkti samstarfið í dag.

Reykjavíkurborg mun afhenda húsnæðið í Miðbæjarskólanum þann 1. febrúar næstkomandi. Ef allt gengur að óskum ætti því starfsemi Kvennaskólans að geta hafist í skólanum haustið 2011. Starfsemi Reykjavíkurborgar í húsinu flyst í húsnæði borgarinnar við Höfðatorg.

Í fréttatilkynningu frá Reykjavikurborg kemur fram að borg og ríki hafi átt með sér samstarf um uppbyggingu framhaldskólanna í borginni allt frá árinu 2003 til ársins 2010. Nú hafi borgarráð samþykkt að framlengja samkomulagið til ársins 2014. Framlengingin feli ekki aðeins í sér afnot Kvennaskólans af Miðbæjarskólanum því lokið verði við framkvæmdir á húsnæði Fjölbrautarskólans í Ármúla og hafist handa við úrbætur á húsnæði Menntaskólans við Sund á samningstímanum.