Hæstiréttur þyngir dóm yfir kynferðisafbrotamanni

Hæstiréttur þyngdi dóm yfir umsjónarmanni meðferðastöðvar sem var dæmdur fyrir kynferðisbrot gagnvart skjólstæðingi sem hugðist fara í vímuefnameðferð hjá meðferðastöðinni.

Maðurinn var dæmdur í Héraðsdómi Reykjaness í byrjun janúar. Þá hlaut maðurinn sex mánaða fangelsisdóm fyrir brot sín, þar af voru þrír mánuðir skilorðsbundnir.

Hæstiréttur komst hinsvegar að þeirri niðurstöðu að maðurinn skyldi fá 9 mánaða fangelsisdóm fyrir brot sín, þar af eru sex mánuðir skilorðsbundnir. Miskabætur handa konunni eru óbreyttar, eða 250 þúsund krónur.

Umsjónarmaðurinn var ákærður fyrir að hafa sett fingur í leggöng konunnar þegar hann var að sinna henni og meðal annars gefið henni slævandi lyf gegn fráhvarfseinkennum eftir fíkniefnaneyslu haustið 2009.

Konan kom til vímuefnameðferðar daginn áður, eftir að hafa skömmu áður sprautað sig með vímuefni og gat því ekki spornað við þessu vegna lyfjaáhrifa sem hún hafði verið undir.

Maðurinn var dæmdur fyrir brotin en sýknaður af því að hafa gefið henni slævandi lyf.