Ekki hægt að ákæra ráðherra úr ríkisstjórn Davíðs

Ekki er hægt að ákæra ráðherra eftir að þrjú ár eru liðin frá því að brot þeirra er framið, samkvæmt 14. grein laga um ráðherraábyrgð. Þetta er ein meginforsenda þess að þingmannanefnd Atla Gíslasonar hefði aldrei getað komist að þeirri niðurstöðu að ákæra bæri þá ráðherra sem sátu í ríkisstjórn þegar bankarnir voru einkavæddir.

Jóhanna Sigurðardóttir forsætisráðherra lýsti í gær efasemdum um ákærur gegn fjórum ráðherrum sem þingmannanefnd Atla Gíslasonar leggur til að verði ákærðir. Jóhanna lagði meðal annars áherslu á það í ræðu sinni á Alþingi að ráðherrarnir hefðu ekki verið í aðstöðu til að afstýra bankahruninu árið 2008.

Jóhanna hefur jafnframt lagt áherslu á það að atburðarrásin í kringum einkavæðingu bankanna verði rannsökuð. Sú einkavæðing fór fram í tíð ríkisstjórnar Sjálfstæðisflokksins og Framsóknarflokksins þegar að Davíð Oddsson og Halldór Ásgrímsson fóru með formennsku í þeim flokkum. Eins og fyrr segir eru, á grundvelli fyrrgreindar lagagreinar, engar líkur á því að ráðherrar í ríkisstjórn á þeim tíma verði dregnir til ábyrgða fyrir meint brot á ráðherraábyrgð.