Vanhugsað að loka bílastæðunum

„Fatlaðir foreldrar komust ekki að dagheimilum og leikskólum vegna þess að það var búið að loka fyrir bílastæðin,“ segir Guðmundur Magnússon, formaður Öryrkjabandalags Íslands (ÖBÍ). „Við fengum töluvert mikið af kvörtunum.“

Bíllaus dagur var í Reykjavík síðastliðinn miðvikudag. Af því tilefni sendi Reykjavíkurborg bréf til leikskóla um þá hugmynd að girða af bílastæði við skólana eða hluta þeirra. Reykjavíkurborg stæði að framkvæmdunum en ákvörðun um þátttöku væri hjá stjórnendum leikskólanna. Fjórir leikskólar af 79 tóku þátt í átakinu. Þar af voru þrír sem girtu bílastæðin alveg af.

„Það er fyrst og fremst vanhugsað og klaufalegt hjá borginni að átta sig ekki á því að það eru ekki allir sem geta sleppt bílnum,“ segir Guðmundur.

Eygerður Margrétardóttir, hjá umhverfis- og samgöngusviði borgarinnar, segir staðið að átakinu í nánu samstarfi við leikskólana og það hafi ekki átt að skerða þjónustu við fatlaða. „Þetta er ekki stór hópur. Ég treysti því að leikskólastjórar taki tillit til þess fólks sem býr við þetta ástand,“ segir hún og kveður borgina mestanpart hafa fengið jákvæð viðbrögð við átakinu. - sv