Pétur Guðgeirsson má dæma í máli níumenninga

Hæstiréttur hefur staðfest að Pétur Guðgeirsson héraðsdómari mun ekki þurfa að víkja sæti í máli fólksins sem ákært er fyrir árás á Alþingi.

Krafa, fjögurra af þeim níu sem ákærðir voru í málinu, um að dómarinn viki sæti var byggð á því að með því að hafa lögreglu í dómhúsinu þegar þingað hefur verið í málinu hafi dómarinn verið „nánast fyrirfram að lýsa yfir sekt á hendur" ákærðu og komið með því í veg fyrir að þeir njóti „réttlátrar málsmeðferðar fyrir dómi, eins og þeim er áskilinn í stjórnarskrá".

Hæstiréttur tekur undir með dómara í Héraðsdómi Reykjavíkur sem sagði í úrskurði sínum að ákvörðun um að hafa lögreglu tiltæka í dómhúsinu væri ekki beint gegn ákærðu í málinu heldur miðaði hún að því að tryggja frið og reglu í þinghöldunum og þar með að því að gæta réttar og hagsmuna allra málsaðila. Yrði ekki séð að dómarinn hafi með þessari ákvörðun sinni fyrirfram lýst yfir sekt á hendur ákærðu eða komið með henni í veg fyrir það að þeir njóti réttlátrar málsmeðferðar fyrir dómi.