Deilur um þrotabú banka streyma til dómstólanna

Holskefla ágreiningsmála vegna föllnu bankanna hellist nú yfir héraðsdómstóla. Fyrstu níu mánuði ársins voru höfðuð 561 ágreiningsmál vegna gjaldþrotaskipta. Þetta eru um 25 sinnum fleiri mál en í meðalári, þegar þau fylla gjarnan annan tuginn.

Þetta kemur fram í samantekt dómstólaráðs yfir fjölda mála sem borist hafa héraðsdómstólunum. „Þau mál sem eru þegar komin eru bara toppurinn á ísjakanum,“ segir Símon Sigvaldason, formaður dómstólaráðs. Hann segir að dómstólar megi búast við að málin verði samtals um það bil 2.000 talsins, og flest þeirra muni líklega koma til dómstólanna á næsta ári.

Málin snúast flest um skilgreiningu á kröfu fyrirtækja og einstaklinga í þrotabú bankanna. Kröfurnar eru flokkaðar í forgangskröfur og almennar kröfur, og ákveða slitastjórnir bankanna í hvorn flokkinn kröfur falla.

Gríðarlegir hagsmunir eru í húfi í flestum tilvikum, þar sem búast má við að lítið sem ekkert fáist upp í almennar kröfur, en mun meira upp í forgangskröfur.

„Þetta verður gríðarlegur fjöldi mála, en einhver af þessum málum eru auðvitað keimlík,“ segir Símon. Þannig gæti úrlausn á einu máli haft fordæmisgildi fyrir önnur sambærileg mál.

Símon segir fjölda þessarar tegundar ágreiningsmála valda stjórnendum héraðsdómstólanna talsverðum áhyggjum. Hann segir að þær áhyggjur minnki ekki þegar haft sé í huga að á sama tíma sé einnig von á því að mál frá embætti sérstaks saksóknara fari að streyma til dómstólanna. Tvö mál frá embættinu hafa þegar borist dómstólunum. Símon segir að búast megi við því að öll mál sem frá sérstökum saksóknara komi verði stór og tímafrek fyrir dómstólana, jafnvel umfangsmeiri en nokkur mál sem áður hafi komið til kasta íslenskra dómstóla.

Nær öll mál sem tengjast hruninu, hvort sem það eru mál frá sérstökum saksóknara eða ágreiningur vegna gjaldþrotamála, munu rata til Héraðsdóms Reykjavíkur. Símon segir þegar byrjað að fjölga dómurum við dómstólinn og búast megi við frekari fjölgun. Hann segir að skilningur sé á því hjá stjórnvöldum að því mikla fé sem ráðstafað hafi verið til sérstaks saksóknara sé illa varið ef þau dagi uppi hjá dómstólum sökum fjárskorts þar.- bj