Kynnir skýrsluna fyrir ráðuneyti

Nettósparnaður vegna niðurskurðar á Heilbrigðisstofnun Vestfjarða yrði um 28 milljónir króna, samkvæmt skýrslu sem unnin var fyrir hönd grasrótarsamtakanna Heimavarnarliðsins. Skýrslan var unnin af Dóru Hlín Gísladóttur, verkfræðingi og talskonu Heimavarnarliðsins, og Kristni Hermannssyni hagfræðingi.

Heilbrigðisráðuneytið hefur skýrsluna undir höndum og hefur Dóra Hlín nú verið boðuð á fund í ráðuneytinu í dag. „Þetta verður fræðslufundur og ég var beðin um að flytja þar erindi um skýrsluna," segir Dóra Hlín. „Það ríkir þarna gagnkvæmur skilningur."

Framkvæmdastjórn Heilbrigðis­stofnunar Vestfjarða hefur sett saman sparnaðartillögur sem ná yfir þessar 28 milljónir sem eiga að sparast með áætluðum niðurskurði. Þröstur Óskarsson framkvæmdastjóri segir að tillögurnar verði gerðar opinberar á næstunni. Þær séu nú á borði ráðuneytisins.

Samkvæmt frumvarpi til fjárlaga 2011 verða fjárheimildir Heilbrigðis­stofnunar Vestfjarða skornar niður um 185 milljónir króna, sem jafngildir rúmlega 20 prósenta samdrætti sé miðað við árið 2009. - sv