Bjartsýn um olíuvinnslu á Drekanum

Sú aukna áhersla sem norsk stjórnvöld hafa nú sett í að undirbúa olíuleit á Jan Mayen-hryggnum var tilefni fyrirspurnar Birkis Jóns Jónssonar, þingmanns Framsóknarflokksins, á Alþingi í dag um hvað liði olíuleit Íslendinga á Drekasvæðinu.

"Því hér er um stórt mál að ræða fyrir íslenska þjóð, fyrir íslenskan ríkissjóð og fyrir okkar afkomendur og framtíðina," sagði Birkir Jón.

Katrín Júlíusdóttir iðnaðarráðherra minnti á að íslensk stjórnvöld væru þegar búin að tilkynna um að næsta olíuleitarútboð yrði á næsta ári. Hún sagði að samstarf við Norðmenn yrði aukið og dýpkað og hún hefði í því sambandi átt fund með olíumálaráðherra Noregs í vor. Þá væri stefnt að því að frumvarp um breytingar á skattalöggjöf í kringum olíuleit yrði lagt fram á yfirstandandi þingi.

"Og ég er afar bjartsýn fyrir framtíðarolíuvinnslu Íslendinga tengda Drekasvæðinu og tel að við eigum eftir að sjá hana verða að veruleika, jafnvel í okkar tíð sem stjórnmálamanna hér á þessu þingi," sagði Katrín.