Eftirlýstur innan Schengen vegna skattsvika

Íslenskur karlmaður er eftirlýstur á Schengen-svæðinu vegna gruns um þátttöku hans í fjársvikamálinu, þar sem sviknar voru út um 270 milljónir króna í formi endurgreidds virðisaukaskatts. Hvorki finnst tangur né tetur af þessum fjármunum, samkvæmt upplýsingum Fréttablaðsins. Ljóst er að þeir höfðu verið lagðir inn á reikning en teknir út í reiðufé, smáum upphæðum í senn, þannig að ekki er um neinar millifærsluslóðir að ræða.

Héraðsdómur Reykjavíkur framlengdi í fyrradag gæsluvarðhald yfir einum þeirra sex sem handteknir voru í tengslum við rannsókn lögreglu á málinu. Hjá manninum sem úrskurðaður var í áframhaldandi gæslu til næstkomandi miðvikudags fundust hátt í tólf kíló af hassi þegar lögregla gerði þar húsleit.

Sex manns eru því áfram í gæsluvarðhaldi vegna rannsóknarinnar, tvær konur og fjórir karlmenn, þar af einn starfsmaður Ríkis­skattstjóra, sem grunaður er um að hafa aðstoðað við fjársvikin. Þetta fólk hefur meira og minna komið við sögu hjá lögreglu.

Maðurinn sem lögregla leitar nú að er talinn dvelja í Suður-Ameríku en þangað mun hann hafa haldið skömmu áður en upp komst um fjársvikin. Hann hefur komið við sögu hjá lögreglu áður. Komi hann inn á Schengen-svæðið verður hann handtekinn. - jss