Kom Íslendingum í opna skjöldu þegar CNN birti listann

Það virðist hafa komið utanríkisráðuneytinu í opna skjöldu þegar listi hinna staðföstu þjóða var birtur á fréttastöðinni CNN þann 18. mars 2003. Þá höfðu engin svör borist frá Bandaríkjastjórn um hvernig listinn yrði notaður.

Eins og greint var frá í hádeginu litu íslensk yfirvöld á það sem svo að vera Íslands á listanum væri algjört trúnaðarmál. Skjal númer 40 af þeim 67 skjölum um aðdraganda stuðnings Íslands við innrás í Írak sem nú hafa verið birt er minnisblað frá Alþjóðaskrifstofu utanríkisráðuneytisins, dagsett 19. mars.

Þar segir meðal annars: „Listi yfir þau 30 ríki sem styðja Bandaríkin og Bretland var lesinn upp í fréttum á CNN sjónvarpsstöðinni kl. 18:30 (ísl.tíma) í gær (18.mars). Þá höfðu, þrátt fyrir beiðni íslenskra stjórnvalda, ekki borist upplýsingar frá bandarískum stjórnvöldum um það hvernig þau hyggðust nota listann eða hvenær og með hvaða hætti hann yrði gerður opinber."

„Enn vantar upplýsingar um það frá bandarískum stjórnvöldum hvað felist í því að vera á þessum 30 ríkja lista," segir ennfremur og bætt við: „Fátt hefur verið um svör í þeim efnum og virðist sem það sé bandarískum stjórnvöldum ekki fulljóst sjálfum."

Þá kemur einnig fram að fyrr um daginn 18.september, þegar listinn var birtur, hafi fulltrúar ráðuneytisins spurt fulltrúa í bandaríska sendiráðinu hér á landi „hvort Íslendingar gætu átt von á því, öllum að óvörum, að listinn yrði birtur á CNN eða í öðrum fjölmiðli." Það kom einmitt á daginn, nokkrum tímum síðar.