Sigurður Einars vildi klappstýrutilburði frá viðskiptaráðherra

Sigurður Einarsson, þáverandi stjórnarformaður Kaupþings, sendi Björgvini G. Sigurðssyni, þáverandi viðskiptaráðherra, harkaleg SMS-skilaboð í byrjun júní 2008 fyrir að gagnrýna stöðu bankanna en ekki klappa hana upp.

Þetta kemur fram í nýrri bók Björgvins, Storminum. Björgvin segist hafa látið þau orð falla í viðtali við fréttamann Ríkisútvarpsins í byrjun júní 2008 sem hafi verið lögð út á þann veg að bankarnir gætu lent í vanda ef lánamarkaðir opnuðust ekki fljótlega. Björgvin segir að örfáum mínútum eftir að fréttin birtist hafi hann fengið „harkalegt sms-skeyti" frá Sigurði Einarssyni sem hann þekkti ekkert á þeim tímapunkti og hafði aðeins einu sinni talað við í síma vegna NIBC-málsins. Í skeytinu hafi Sigurður skammast yfir því að Björgvin væri að „gagnrýna stöðu bankanna en ekki klappa hana upp sem fagráðherra," eins og Björgvin lýsir því í bókinni. Björgvin hafi því ákveðið að hringja í Sigurð og benda honum á að hann hefði verið heldur kurteisari og blíðari á manninn í síðustu samskiptum þeirra.

Björvin segir í bókinni að Kaupþingsmenn hafi leikið alltof djarft, en komið hafði í ljós að þeir hafi ekki ráðið við yfirtökuna á hollenska NIBC bankanum. Ekkert varð sem kunnugt er úr þeim áformum þeirra.