Ofbeldismenn sitji ekki eins og kóngar heima

„Þetta er mjög til bóta. Við horfum upp á þann fáránleika á hverjum degi að fjölskyldur eru gerðar brotrækar af heimilum sínum vegna ofbeldis heimilismanns," segir Sigþrúður Guðmundsdóttir, framkvæmdastýra Kvennaathvarfsins.

Í félagsmálaráðuneytinu er ný aðgerðaáætlun gegn kynbundnu ofbeldi í undirbúningi. Samkvæmt henni á að leggja fram frumvarp um nálgunarbann sem gerir það heimilt að fyrirskipa einstaklingum, sem beita heimilismenn sína ofbeldi, að yfirgefa heimilið. Þetta hefur verið kallað austurríska leiðin.

Sigþrúður segir rökrétt að fara þessa leið. Ofbeldismenn eigi ekki að fá að sitja eins og kóngar heima á meðan makar þeirra og börn leiti til Kvennaathvarfsins.

„Ég fagna því ef að þessi leið kemst í framkvæmd þannig að það verði þannig að brotaþolar geti haldið áfram að lifa sínu lífi á heimilinu en að brotamaður sé fjarlægður. Sá sem brýtur af sér á að vera sá sem fer alveg eins og í fótboltanum."

Austurríska leiðin eða brottvísun er lagaheimild sem gerir lögreglu kleift að fjarlægja ofbeldismann af heimili sínu og banna komur hans þangað um tiltekinn tíma. Aðferðin var lögfest í Austurríki árið 1997 og varð til þegar Austurríkismenn stóðu frammi fyrir því að opna tuttugasta kvennaathvarfið í landinu.