Brýnt að veita ofbeldismönnum meðferð

Félagsmálaráðherra telur brýnt að efla meðferðarúrræði fyrir unga ofbeldismenn og aðra karla sem beita konur og börn ofbeldi. Þetta kemur fram í þingsályktunartillögu um nýja jafnréttisáætlun til fjögurra ára sem Árni Páll Árnason félagsmálaráðherra hefur kynnt.

Eftir því sem fram kemur í þingsályktunartillögunni sýnir ný rannsókn á ofbeldi í nánum samböndum að tíðni ofbeldis mælist mjög svipuð hér á landi og í öðrum löndum. Um það bil fjórða hver kona verði á ævi sinni fyrir kynbundnu ofbeldi af hálfu kærasta, sambýlismanns/maka eða fyrrverandi sambýlismanns eða maka.

Í þingsályktunartillögunni segir að kynbundið ofbeldi vegi að grundvallarmannréttindum og mannhelgi og meðan það sé við lýði verði jafnrétti kynjanna ekki náð. Um þessar mundir fari fram á vegum Evrópuráðsins vinna að samningi gegn kynbundnu ofbeldi og heimilisofbeldi og muni Ísland taka þátt í þeirri vinnu. Þá sé brýnt að vinna að nýrri aðgerðaráætlun gegn kynbundnu ofbeldi þar sem sjónum verði beint að réttarkerfinu, ofbeldismönnum og aðstoð við þá.