Týr aðstoðar vélarvana togara

Varðskipið Týr kom um klukkan fjögur í nótt að erlendum togara sem var vélarvana um 490 sjómílur vestsuðvestur af Reykjanesi. Varðskipið lagði úr höfn síðdegis á mánudag til að aðstoða togarann sem er 60 metra langur. Þegar varðskipið kom að togaranum í nótt var dráttarlínu skotið yfir og gekk aðgerðin vel, að því er fram kemur í tilkynningu frá Landhelgisgæslunni. Hagstæða veðurskilyrði eru á svæðinu og standa vonir til að varðskipið verði komið í Faxaflóa á laugardag.

„Leitar og björgunarsvæðið sem Landhelgisgæsla Íslands er ábyrg fyrir er samkvæmt alþjóðlegum skilgreiningum 1,8 milljónir ferkílómetrar að stærð og nær norður fyrir Jan Mayen í norðri, austur að 0°lengdarbaug í austri, austur og suður fyrir Færeyjar og þaðan að Hvarfi, syðst á Grænlandi og norður með austurströnd Grænlands," segir í tilkynningunni.