„Kærðu mig líka, Ásta“

„Ég hef skrifað undir áskorunina sem nú er á leiðinni til yfirvalda vegna máls nímenninganna. Kærðu mig líka, Ásta!" segir Mörður Árnason, varaþingmaður Samfylkingarinnar. Hann gagnrýnir að ákæra hafi verið gefin út í máli mótmælenda sem ruddust inn í Alþingi í búsáhaldabyltingunni. Ákæran eigi ekkert skylt við öryggi. Hún sé pólitísk og augljóslega ætlað að vara almenning við mótmælum í framtíðinni.

Mál níu mótmælenda sem ákærðir eru fyrir árás á Alþingi í desember 2008 verður tekið fyrir í Héraðsdómi Reykjavíkur í dag. Þeir eiga yfir höfði sér að minnsta kosti eins árs fangelsi verði þeir fundnir sekir.

Ásta Ragnheiður Jóhannesdóttir, forseti Alþingis og flokkssystir Marðar, segir í svari við fyrirspurn Birgittu Jónsdóttur, þingmanns Hreyfingarinnar, sem lagt var fram á Alþingi í gær að það hafi verið skrifstofustjóri Alþingis sem óskaði eftir lögreglurannsókn í málinu og þar hafi forseti Alþingis hvergi komi að. Á skrifstofustjóranum hvíli sjálfstæð skylda til að standa vörð um öryggi starfsmanna Alþingis sem og alþingismanna.

Óþolandi að Samfylkingin taki þátt í leiknum

Mörður er ósáttur við svör Ástu Ragnheiðar og fjallar um málið í pistli Eyjunni. „Strax og forseti alþingis heyrði af þessari beiðni - hafi hún ekki beinlínis verið borin undir hann - átti forsetinn að láta saksóknara vita um eigin afstöðu til málsins. Úr því það var ekki gert er eðlilegt að svo sé litið á að forseti alþingis sé sammála skrifstofustjóranum og saksóknaranum - og beri beina pólitíska ábyrgð á því að málaferlunum getur lokið með löngum fangelsisdómum yfir nímenningunum vegna árásar á alþingi. Í fyrsta sinn síðan 1949."

Varaþingmaðurinn segir að það sé óþolandi að Samfylkingin taki þátt í þessum leik. „Og þyngra en tárum taki fyrir okkur félaga og samstarfsmenn Ástu Ragnheiðar að sjá hana gengna í þessi björg," segir Mörður í pistlinum sem hægt er að lesa hér.