Ringo fann loksins Guð

Bítillinn Ringo Starr segist loksins hafa fundið Guð eftir fjörutíu ára leit. Hann segir að sín andlega hlið fái að njóta sín á nýjustu plötu sinni Y Not. „Eftir að hafa leitað í langan tíma snýst þetta allt saman um að finna sjálfan sig. Hvað mig varðar þá er Guð hluti af mínu lífi,“ sagði Ringo í viðtali við Los Angeles Times. „Ég held að þessi leit hafi staðið yfir síðan á sjöunda áratugnum. Ég missti fótanna í mörg ár en komst á beinu brautina aftur, þökk sé Guði,“ sagði hann og átti þar við drykkjutímabil sitt á áttunda áratunum. Þrátt fyrir að Ringo verði sjötugur í ár er hann ekki jafnhræddur nú og þegar hann komst á fimmtugsaldurinn. „Að verða fertugur var hræðilegt. Ég er að verða sjötugur og ég væri alveg til í að nálgast fertugsaldurinn en það er víst ekki að fara að gerast,“ sagði hann og bætti við: „Því eldri sem ég verð því meira læri ég um hvað lífið snýst um.“