Rannsaka hvort biskupsmálið hafi verið þaggað niður

Nefnd sem mun rannsakað viðbrögð kirkjunnar við ásökunum á hendur Ólafi Skúlasyni um kynferðisbrot árið 1996 verður skipuð á Kirkjuþingi um helgina.

Samkvæmt upplýsingum frá Kirkjuþingi er nefndinni ætlað að leggja mat á hvort um mistök, vanrækslu eða vísvitandi þöggun eða tilraun til þöggunar hafi verið að ræða af hálfu vígðra þjóna og starfsmanna kirkjunnar, eða annarra þeirra sem gegnt hafa trúnaðarstörfum í þágu kirkjunnar. Tillagan gerir ráð fyrir að formaður nefndarinnar hafi hæfi sem hæstaréttardómari.

Fjölmörg önnur mál verða til umræðu á þinginu. Meðal annars frumvarp til nýrra þjóðkirkjulaga sem var upphaflega samþykkt á kirkjuþingi 2008 en náðist ekki að leggja það fram á Alþingi. Nú er það tekið upp á ný. Markmið frumvarpsins er að auka sjálfstæði kirkjunnar, einfalda löggjöf og færa ábyrgð og ákvarðanatöku í ríkara mæli til kirkjuþings.

Kirkjuþingið verður sett á laugardag klukkan níu. Á setningarfundi verður fjallað um hlutverk og stöðu þjóðkirkjunnar í siðvæðingu samtímans. Þar munu Pétur Kr. Hafstein, forseti kirkjuþings, Karl Sigurbjörnsson, biskup Íslands, Ögmundur Jónasson, ráðherra dóms- og mannréttindamála, og Stefán Einar Stefánsson, guðfræðingur og viðskiptasiðfræðingur, flytja ávörp.