Bústólpi fær lífræna vottun fyrir framleiðslu kjarnfóðurs

Vottunarstofan Tún hefur staðfest að fyrirtækið Bústólpi ehf. uppfylli kröfur um lífrænar aðferðir við framleiðslu á kjarnfóðri. Vottorð þessa efnis var formlega afhent í vinnslustöð fyrirtækisins á Akureyri í morgun.

Bústólpi er fyrsta sérhæfða kjarnfóðurfyrirtækið hér á landi sem hlýtur vottun til lífrænnar framleiðslu á kjarnfóðri.

Með vottun Túns er staðfest að Bústólpi noti viðurkennd hráefni við framleiðslu á hinu vottaða kjarnfóðri, að lífræn hráefni séu á öllum stigum vinnslu aðgreind öðrum efnum og afurðum, að aðferðir við úrvinnslu og blöndun samræmist reglum um lífræna framleiðslu, og að gæðastjórnun, skráningar og merkingar uppfylli settar kröfur.

Fyrirtækið hefur haslað sér völl með framleiðslu á fóðri fyrir nautgripi, sauðfé, svín, hross og alifugla. Auk þess selur það sáðvöru, áburð og aðrar rekstrarvörur til landbúnaðar.

Bústólpi hefur nú hafið nýtingu á lífrænu íslensku byggi til framleiðslu á kjarnfóðri fyrir lífræna nautgriparækt. 



Þýðingarmikið fyrir fyrirtækið

Hólmgeir Karlsson, framkvæmdastjóri Bústólpa, segir þessa lífrænu vottun hafa mikla þýðingu og geri hún fyrirtækinu kleift að þjónusta þá vaxandi sprotagrein sem lífrænn landbúnaður er.

Hér á landi stunda nú að jafnaði á milli 60 og 70 aðilar vottaða lífræna ræktun, vinnslu lífrænna hráefna og söfnun náttúruafurða. Þessir aðilar framleiða nokkur

hundruð tegundir vottaðra afurða fyrir markað hérlendis og í vaxandi mæli einnig til útflutnings.

Framleiðsla á vottuðu lífrænu kjarnfóðri er forsenda þess að búfjárrækt sem byggir að hluta eða öllu leyti á aðfengnum fóðurefnum geti tileinkað sér lífrænar aðferðir.

Um 80 bændur og fyrirtæki með lífræna vottun

Vottaðar lífrænar afurðir og náttúruafurðir hafa þá sérstöðu á markaði að allur ferill þeirra, frá ræktun eða söfnun hráefna, til pökkunar í neytendaumbúðir eða afhendingar í lausu, er undir eftirliti óháðs aðila, það er vottunarstofu sem fylgist með því að uppruni og meðferð afurðanna sé í samræmi við alþjóðlegar og íslenskar kröfur um lífræna framleiðslu.

Vottunarstofan Tún hóf vottun lífrænna afurða á Íslandi árið 1996 og í Færeyjun árið 2006. Síðan þá hafa yfir 80 bændur og fyrirtæki hlotið vottun. Auk þess vottar Tún nú framleiðslu átta fyrirtækja á náttúruvörum og aðföngum til lífrænnar framleiðslu.

Tenglar:

Vottunarstofan Tún



Bústólpi ehf.