Örvæntingarfullt herútkall Jóhönnu

„Það var ágætis tilraun hjá Jóhönnu til þess að rugla umræðuna," segir Sigurður Kári Kristjánsson, þingmaður Sjálfstæðisflokksins.

Fyrir helgi skoraði Jóhanna Sigurðardóttir, forsætisráðherra, á stjórnarandstöðuna að bera upp vantrauststillögu. „Ef þessi ríkisstjórn er svona ómöguleg eins og stjórnarandstaðan er að halda fram, af hverju ber hún ekki fram vantraust á þessa ríkisstjórn? Komið þið fram með vantraust á þessa ríkisstjórn. Við skulum sjá hvort hún hafi meirihluta hér á þingi til þess að takast á við þessi viðfangsefni," sagði Jóhanna í umræðum á Alþingi.

Sigurður fjallar um málið í pistli á heimasíðu sinni. Hann segir að Jóhanna hefði getað sparað sér að óska eftir því að tillaga um vantraust kæmi fram í ljósi þess að vantraustið blasi nú þegar við um allt þjóðfélagið.

Sigurður segir mikilvægt að fólk átti sig á hvers vegna Jóhann setti þessa áskorun fram. „Það var ekki gert til þess að kvetja stjórnarandstöðuna til þessa tillöguflutnings," segir Sigurður og bætir við: „Áskorunin var örvæntingarfullt herútkall Jóhönnu til þingmanna Samfylkingar og Vinstri grænna, sett fram til þess að reyna að þétta raðirnar í ríkisstjórnarsamstarfi sem er að fara í vaskinn og þjóðin er búin að fá nóg af."