Tveir fluttir slasaðir til Reykjavíkur

Gert er ráð fyrir að tveir farþeganna sem slösuðust í rútuslysinu við Einarsstaði í Þingeyjarsýslu fyrr í kvöld verði sendir með sjúkraflugi til Reykjavíkur í kvöld, samkvæmt upplýsingum frá framkvæmdastjóra lækninga á Fjórðungssjúkrahúsinu á Akureyri.

Alls voru 17 í rútunni þegar að hún valt. Fjórir til fimm verða undir eftirliti á slysadeild Fjórðungssjúkrahússins á Akureyri fram á nótt og jafnvel til morguns. Ef þörf krefur munu þeir gangast undir aðgerðir. 10 - 12 hlutu minniháttar meiðsl og munu líklegast fara af sjúkrahúsi í kvöld.

Það voru 15 erlendir ferðamenn í rútunni, auk fararstjóra og bílstjóra. Lögreglan kannar nú hvort bremsur á rútunni hafi verið bilaðar en engin bremsuför hafa fundist þar sem rútan fór út af veginum.