Tengsl fundin milli erfða og legslímuflakks

Niðurstöður nýrrar rannsóknar benda til að tengsl séu á milli erfða og endómetríósu, eða legslímuflakks. Er þetta í fyrsta sinn sem sýnt er fram á slík tengsl.

Almennt er talið að um 2 til 5% íslenskra kvenna séu með sjúkdóminn. Helstu einkenni eru sársaukafullar blæðingar og tíðaverkir, verkir í kviðarholi, sársauki við egglos, samfarir og þvaglát. Engin lækning hefur fundist við sjúkdómnum.

Frekari rannsókna er þörf til þess að skilja hvað þessi genatengsl þýða en vonir standa til þess að niðurstöður rannsóknarinnar verði til þess að bæta greiningu og meðferð kvenna með endómetríósu.

The International Endogene Consortium sem hefur rannsakað möguleg tengsl þarna á milli komst að þeirri niðurstöðu að breytingar á litningum 1 og 7 tengist endómetríósu. Þetta kemur fram í tilkynningu frá Samtökum kvenna með endómetríósu.

Þar kemur fram að á litningi 7 eru það gen sem stýra myndun legslímhúðarinnar og á litningi 1 er það gen sem er mikilvægt fyrir hormónastarfsemi líkamans og þróun kvenæxlunarfæra sem eru talin tengjast endómetríósu. Samkvæmt rannsókninni eru miðlungs og alvarleg tilfelli af endómetríósu frekar tengd ættgengi og þar með genum, frekar en vægari tilfelli sjúkdómsins. Breytileikinn á litningi 1 eykur líkur á miðlungs eða alvarlegri endómetríósu um 16% en breytileikinn á litningi 7 um 40%.

Talið er að um 176 milljón konur um heim allan séu með endómetríósu.

Legslímuflakk getur valdið ófrjósemi en um 30-40% kvenna með sjúkdóminn geta búist við að lenda í erfiðleikum með barneignir. Einungis er hægt að greina endómetríósu í kviðarholsspeglun og almennt eru hormónagetnaðarvarnir notaðar til þess að meðhöndla sjúkdóminn. Ekki er til nein lækning við sjúkdómnum enn sem komið er.

Tengill:

Samtök kvenna með endómetríósu