Hvetja foreldra til að ganga í skólann með börnunum

Ögmundur Jónasson, samgönguráðherra, setti átakið „Göngum í skólann" í morgun að viðstöddum nemendum úr Fossvogsskóla í Reykjavík og Snælandsskóla í Kópavogi. Þetta er í fjórða sinn sem átakið fer fram og hefur það þann tilgang að hvetja nemendur og foreldra til að ganga eða hjóla í skóla.

Ögmundur Jónasson sagði brýnt að leiða hugann að þeirri hollustu sem hreyfing og útvera hefði í för með sér. Um leið og það væri heilsuvænt mætti einnig leiða hugann að umhverfismálum.

Þær Rannveig Ásgeirsdóttir, fulltrúi skólanefndar Kópavogsbæjar, og Oddný Sturludóttir, formaður menntaráðs Reykjavíkur voru einnig viðstaddar í morgun en Örvar Ólafsson, verkefnastjóri hjá ÍSÍ, stýrði athöfninni. Að athöfninni lokinni var nemendum boðið uppá ratleik.