Sjúkraliðar vilja að laun þeirra verði leiðrétt

Sjúkraliðar krefjast þess að laun þeirra hjá ríkisstofnunum verði leiðrétt og að þegar verði samið við stéttina sem verið hefur með lausa samninga vel á annað ár.

Sjúkraliðar hafa dregist verulega aftur úr viðmiðunarstéttum sérstaklega karlastéttum innan BSRB sem þeir hafa borið sig saman við og hafa nýverið samið um talsverðar launahækkanir, líkt og lögreglumenn, tollverðir, og slökkviliðs- og sjúkraflutningamenn. Sjúkraliðar hafa reyndar ekki lagt í að bera kjör sín saman við flugumferðarstjóra segir Kristín Á. Guðmundsdóttir, formaður Sjúkraliðafélags Íslands.

Fram kom í umræðum á Alþingi nýlega að miðað við aðrar heilbrigðisstéttir hafi launalækkun verið mest hjá sjúkraliðum, eða rúm tíu prósent frá síðasta ársfjórðungi ársins 2008, og hjá þeim hefur fækkun starfa einnig verið hvað mest.

Í ályktun fjölmenns fundar trúnaðarmanna sjúkraliða frá því í gær er Steingrímur J. Sigfússon fjármálaráðherra hvattur til afskipta af málinu og sýna fram á að umræðan um að leiðrétta eigi kynbundinn launamun sé ekki bara í orði heldur einnig á borði.