Sóley: Gengið of nærri grunnþjónustunni

„Niðurstaða ársreiknings Reykjavíkurborgar er árangur af niðurskurði, þar sem gengið hefur verið allt of nærri grunnþjónustu sveitarfélagsins gagnvart íbúum. Athyglisverðast er þó að skoða stöðu B-hlutafyrirtækja borgarinnar, en þau sinna grunnþjónustu sem skiptir sköpum fyrir alla borgarbúa. Hæst bera þar Orkuveita Reykjavíkur, Félagsbústaðir, Strætó, Sorpa og Slökkviliðið - en staða þeirra grafalvarleg," segir Sóley Tómasdóttir, oddviti VG í Reykjavík, í tilkynningu. Ársreikningur Reykjavíkurborgar var lagður fram í borgarstjórn í dag.

Sóley segir að staða sveitarfélags sem hafi komið hita- og vatnsveitu, almenningssamgöngum, félagslega íbúðarkerfinu og slökkviliðinu í slík vandræði geti ekki verið góð.

„Vinstri græn hafa ítrekað farið fram á endurskoðun og greiningu á stöðu mála, en allt kemur fyrir ekki. Afskiptaleysisstefna frjálshyggjunnar, stefna meirihluta Sjálfstæðisflokks og Framsóknarflokks í borgarstjórn Reykjavíkur hefur verið sú að aðhafast ekkert. Að halda því svo fram gagnvart almenningi að árangur hafi náðst og að hér sé um sigur að ræða fyrir borgina er ámátlegt af hálfu meirihlutans," segir Sóley.